LÍNGUAS CLÁSSICAS

Página de Estudos das Fontes Pesquisadas

    Officium Sancti Francisci - Ad II Vesperas

    24 – Hymnus 
    Auctore Thoma Capuano, Cardinali S. Sabinae. 

    I. Decus morum, dux Minorum, 
    Franciscus tenens bravium 
    In te vite datur vitae, 
    “Christe, redemptor omnium”. 

    II. Plaudat frater, regnat pater 
    Concivis caeli civibus; 
    Cedat fletus, psallat coetus, 
    “Exsultet caelum laudibus”. 

    III. Demptum solo, datum polo 
    Signorum probant opera; 
    Ergo, vivit, nam adivit 
    “Aeterna Christi munera”. 

    IV. Pro terrenis votis plenis 
    Reportat dona gloriae; 
    Quem decoras, quem honoras, 
    “Summae Deus clementiae”. 

     V. Hunc sequantur, huic iungantur 
    Qui ex Aegypto exeunt; 
    In quo duce, clara luce, 
    “Vexilla Regis prodeunt”. 

    VI. Regis signum ducem dignum 
    Insignit manu, latere; 
    Lux accedit, nox recedit, 
    “Iam lucis orto sidere”. 

    VII. Est dux fidus, clarum sidus: 
    Ducit, relucet, devia 
    Devitando, demonstrando 
    “Beata nobis gaudia”. 

    VIII. Mina gregem, dux, ad Regem, 
    Collisor hostis callidi; 
    Nos conducas et inducas 
    “Ad cenam Agni providi”. Amen. 

    24a - V. Ora pro nobis, beate Francisce. 
    R. Ut digni efficiamur promissionibus Christi. 

    25 - Ad Magnificat Antiphona 

    O virum mirabilem 
    In signis et prodigiis, 
    Languores cum daemoniis 
    Quoslibet pellentem. 
    Dat aurem suis avium 
    Praedicans silvestrium 
    Verbis intendentem. 
    O vita laudabilem, 
    Qua fidem sic magnificat; 
    Sed et multos vivificat 
    Mortuos defunctus. 
    Francisce, nos caelestium 
    Fac consortes civium, 
    Quibus es coniunctus. 

    26 - Antiphonae ad Benedictus et Magnificat infra Octavam et pro Commemoratione S. Francisci. 
    Adscribitur Gregorio Papae IX. 

    I. Sancte Francisce, propere 
    Veni, pater, accelera 
    Ad populum, qui premitur 
    Et teritur sub onere, 
    Palea, luto, latere; 
    Et, sepulto Aegyptio 
    Sub sabulo, nos libera, 
    Carnis exstincto vitio. 

    Tribuitur Thomae Capuano Cardinali S. Sabinae. 

    II. Salve, sancte pater, patriae lux, forma Minorum, 
    Virtutis speculum, recti via, regula morum: 
    Carnis ab exsilio, duc nos ad regna polorum. 

    Gregorio IX attributa. 

    III. Plange, turba paupercula, 
    Ad patrem clama pauperum: 
    Hoc lugubre suspirium, 
    Pater Francisce, suscipe, 
    Et prode Christo stigmata 
    Lateris, pedum, manuum, 
    Ut nobis reddat orphanis 
    Tanti patris vicarium. 

    Assignatur Cardinali Rainerio Capoccio. 

    IV. Caelorum candor splenduit, 
    Novum sidus emicuit: 
    Sacer Franciscus claruit, 
    Cui Seraph apparuit, 
    Signans eum charactere 
    In volis, plantis, latere, 
    Dum formam crucis gerere 
    Vult corde, ore, opere.